نزل من شوية احمد مكي علي صفحته علي الفيسبوك اول اعلان طويل للفيلم بعد ما كان نزل اليومين اللي فاتوا اعلانين قصيرين للفيلم واحد عن الفيلم الاول "حزلئوم في الفضاء" والتاني باسم "الديك في العشة" وكان مدته كل واحد منهم ثواني الا انه احمد مكي نزل من شوية اول اعلان طويل للفيلم ومدته 2 دقيقة و4 ثواني .. فيلم سيما علي بابا هو فكرة جديدة وغريبة واول مرة تتعمل في تاريخ السينما المصرية فالفيلم عبارة عن فيلمين جوه بعض حتي كان مكتوب علي بوستر الفيلم " فيلمين في بروجرام واحد " زي ما بتعمل سينمات الدرجة التالتة واشهرهم سينما علي بابا في بولاق.
الفيلم الاول هو حزلئوم في الفضاء وبتدرو احداثه عن كوكب "ريفو" في الفضاء اللي بيخطف حزلقوم ويعمل عليه تجارب خيالية وبيشارك في الفيلم ده هشام اسماعيل ولطفي لبيب في دور الفضائيين.
والفيلم التاني اسمه "الديك في العشة " وبتدور احداثه في مزرعة وبيجسد مكي شخصية ديك بيعيش وسط حيوانات المزرعة اللي هما فيها وبيحاول مكي إنه يدافع عن الذئاب والضباع اللي بتحاصر المزرعة وبتفرض اتاوات عليهم وبتظهر في الفيلم ده ايمي سمير غانم في دور فرخة.
فيلم سيما علي بابا عمل فيه مكي مكياج شكله جديد جداً خلي كل الفنانين المشاركين معاه في الفيلم يظهروا في شكل مختلف جداً سواء في ادوار الفضائيين او في ادوار حيوانات المزرعة والفيلم من تأليف شريف نجيب واخراج احمد الجندي.
